आमचोक गाउँपालिकाले ३० विपन्न परिवारलाई घर निर्माण गरिदिएको छ ।
गाउँपालिकाले आर्थिक अवस्था कमजोर भएका परिवार पहिचान गरी एक परिवारका लागि ३ लाख रुपैयाँको लागतमा घर बनाइदिएको गाउँपालिका अध्यक्ष अशोक राईले जानकारी दिए ।
विपन्न परिवार परिवार खोजी तथा पहिचानका लागि समिति गठन गरेर काम गरिएको उनको भनाइ थियो । ‘हामीले यहाँका पुस्तौंदेखी पालमुनी तथा गाईगोठमा बसिरहेका अति विपन्न ३० परिवारको घर बनाइदिएका हौं’, अध्यक्ष राईले भने, ‘राज्यले पनि गाँस, बास र कपासलाई नागरिकको मौलिक हकमा राखेको छ । त्यसैअनुरुप हामीले नीति तथा कार्यक्रम नै बनाएर घर बनाइएपछि अहिले उनीहरुलाई प्रत्यक्ष लाभ पुगेको छ ।’
गाउँपालिकाले अतिविपन्न परिवारलाई स्थानीय सरकार भएको अनुभूति दिलाएको स्थानीय ७३ वर्षीय लाभग्राही वृद्ध कानबहादुर राईले बताए ।
जन्मेदेखि घरविहीन भएर बसेको अवस्थामा गाउँपालिकाले घर निर्माण गरिदिएपछि आफू हर्षित भएको उनको भनाइ थियो । ‘म ७३ वर्ष पुगँे । अहिलेसम्म मेरो जीवन गाईगोठमा बितेको थियो । यो जुनीमा मेरो घर होला भन्ने सोचेको पनि थिइनँ । तर, गाउँपालिकाले घर बनाइदियो । आफ्नो कोही पनि साहरा नभएकाले वृद्धभत्ताबाट आएको पैसाले ज्यान बचाएको छु’, वृद्ध राईले भने, ‘विगतमा कोही नहुँदा र बासको पनि अभावमा कष्टकर जीवन बिताउनु परे पनि अहिले अभिभावक पाएको जस्तो भएको छ । गरिबको बच्चो भइयो । घर नहँुदा यो उमेरसम्म आउदा धेरै कष्टपार गरियो । आफ्नै घरमा मर्न पाइएला भन्ने सोचेको पनि थिइन् तर अहिले आफ्नै घरमा बस्न पाउँदा खुसी छु ।’
गाउँपालिकाले घर निर्माण गरी दिएपछि दैनिक जीवनमा परिवर्तन आएको अर्का स्थानीयवासी जिदर शेर्पाले बताए । अहिले परिवारसहित गाउँपालिकाले निर्माण गरिदिएको घरमा बस्दै आएका उनले भने, ‘गरिबीका कारण जीवनमा एउटा घर बनाउन पनि सकेको थिइनँ । अर्काको बनिबुतो गरेर दिन जान्छ । सरकार चाहिने भनेको हामीजस्ता नागरिकलाई त होनी । घर पाउँदा निकै खुसी लागेको छ ।’
खुला आकाश तथा गोठ टहरामा जीवन कटाउँदै आएका कुमार सार्कीले पनि नयाँ घर पाएका छन् । अहिले नयाँ घरमा बस्न थालेका उनले घर नहुँदा दिन बिताउन समस्या भएको बताए । ‘हिउँद तथा वर्षात्को समयमा बालबच्चालाई बचाउन नै गाह्रो हुन्थ्यो’, उनले भने, ‘ढिलै भए पनि राज्यले हामीलाई देख्यो । हाम्रो पीडा बुझ्यो । असाध्धै खुसी छु । म जस्ता धेरै दलित परिवारले घर पाएका छौँ ।’
गाउँपालिकाले गरिब तथा विपन्न परिवारलाई लक्षित फुसको छानो हटाउने अभियानसमेत सञ्चालन गर्नुका साथै १ घर, १ धाराको अभियान पनि चलाइएको बताइयो ।
