काठमाडौं । नेपाल कृषि मेसिनरी व्यवसायी संघले चितवनमा आयोजना गर्ने भनिएको ‘सलोम पाँचौँ राष्ट्रिय कृषि यान्त्रीकरण प्रदर्शनी–२०७८’ स्थगित गरिएको छ । संघले मंगलबार एक विज्ञप्ति जारी गर्दै मेला हाललाई स्थगित गरिएको जानकारी गराएको हो ।
पुस २७ गते बसेको मेला आयोजक मूल समितिको सिफारिसअनुसार कोभिड–१९ को संक्रमण बढ्दो अवस्थामा रहेपछि गृह मन्त्रालयले २५ जनाभन्दा बढी भेला हुने सभा, सम्मेलन, मेला, प्रदर्शनी आदि नगर्न निर्देशन दिएसँगै संघले प्रदर्शनी स्थगित गरेको हो ।
संघले जारी गरेको विज्ञप्तिमा भनिएको छ, ‘२०७८ पुस २५ गतेको गृह मन्त्रालयको निर्देशन, जिल्ला प्रशासन कार्यालय, चितवनको २०७८ पुस २६ गतेको आदेश र जिल्ला कोभिड–१९ संकट व्यवस्थापन समिति चितवनको भौतिक रुपमा २५ जनाभन्दा बढी उपस्थित भइ सभा, सम्मेलन, मेला, प्रदर्शनी, जुलुसजस्ता कार्य गर्न रोक लगाउने निर्णय बमोजिम ‘सलोम पाँचौं राष्ट्रिय कृषि यान्त्रीकरण प्रदर्शनी–२०७८’ अर्को सूचना जारी नभएसम्म हाललाई स्थगन गरिएको छ ।’
कोभिड–१९ को जोखिम कम भएपछि यो प्रदर्शनी पुनः आयोजना गरिने संघले जनाएको छ । संघले यही माघ ५ गतेदेखि माघ ८ गतेसम्म चितवनको एक्स्पो सेन्टरमा प्रदर्शनी गर्ने तयारी गरेको थियो । यो प्रदर्शनीलाई नेपाल सरकार कृषि तथा पशुपन्छी विकास मन्त्रालय, कृषि विभाग, कृषि पूर्वाधार विकास तथा कृषि यान्त्रीकरण प्रवर्द्धन केन्द्र, प्रधानमन्त्री कृषि आधुनिकीकरण परियोजना र संघले संयुक्त रुपमा आयोजना गरेका थिए ।
