बारा । यस वर्ष बारामा धान लगाएको क्षेत्रफल र धान उत्पादन दुवै बढेको छ ।
समयमै मनसुन सक्रिय भएपछि गतवर्षको तुलनामा यो वर्ष २ हजार ९१४ हेक्टर बढी क्षेत्रफलमा रोपाइँ भएको थियो भने ६ हजार ३५२ मेट्रिकटन बढी धान उत्पादन भएको थियो ।
कृषि ज्ञानकेन्द्र बाराका अनुसार चालू आर्थिक वर्षमा २ लाख ६२ हजार ७४१ दशमलव २५ मेट्रिकटन धान उत्पादन भएको छ । अघिल्लो वर्ष २ लाख ५६ हजार ३८९ दशमलव २५ मेट्रिक टन धान उत्पादन भएको थियो । यो गत वर्षको तुलनामा ६ हजार ३५२ मेट्रिकटन धान बढी उत्पादन भएको हो ।
चालू आर्थिक वर्षमा उत्पादन भएको धानमध्ये अगहनी १ लाख ४१ हजार ५७७ दशमलव २५ मेट्रिक टन, भदैया ५१ हजार १९१ दशमलव ५ मेट्रिक टन र चैते धान ६९ हजार ९७२ दशमलव ५ मेट्रिक टन उत्पादन भएको केन्द्रका कृषि विज्ञ गेनालाल मण्डलले जानकारी दिए । उनका अनुसार चालू आर्थिक वर्षमा अगहनी ३४ हजार ११२ हेक्टर, भदैया ११ हजार ९०५ हेक्टर र चैते १५ हजार १०५ गरी कुल ६१ हजार १२५ हेक्टर क्षेत्रफलमा धान खेती गरिएको थियो ।
गत आर्थिक वर्षमा अगहनी १ लाख ४५ हजार २०१ दशमलव २५ मेट्रिक टन, भदैया ५४ हजार ८८२ दशमलव छ मेट्रिक टन र चैते धान ५३ हजार ३०६ मेट्रिक टन उत्पादन भएको थियो । यसका लागि अगहनी १४ हजार १६५ हेक्टर, भदैया ११ हजार ९३१ हेक्टर र चैते १२ हजार ११५ हेक्टर क्षेत्रफलमा लगाएको केन्द्रका कृषि विज्ञ मण्डलले बताए ।
बारामा कुल ६९ हजार ९६३ हेक्टर कृषियोग्य जमिन रहेको छ । तीमध्ये चुरेपहाडतर्फ ९९५, तराईतर्फ ६१ हजार ८१८ गरी कुल ६२ हजार ८२३ हेक्टर क्षेत्रफलमा खेती हुने गरेको छ । तीमध्ये ७ हजार १४० हेक्टर जमिन बाँझो रहेको छ भने वर्षैभरि सिञ्चित हुने ३३ हजार १३२ र आंशिक सिञ्चित हुने २९ हजार ६९१ हेक्टर क्षेत्रफल रहेको केन्द्रले जनाएको छ ।
