लन्डन - बीबीसी मास्टरसेफ प्रोफेसनल्सको ‘रिम्याच’ उपाधि नेपाली सेफ सन्तोष साहले जितेका छन् । सोमबार साँझ बीबीसी वानमा प्रसारित फाइनलमा साहले अन्य ३ प्रतिस्पर्धीलाई उछिनेर साे उपाधि जितेका हुन् ।
विगतका मास्टरसेफ प्रोफेसनल्स फाइनलिस्टहरुलाई पुनः अवसर दिँदै प्रतिस्पर्धा गराइएको थियाे । प्रतिस्पर्धामा सन् २०२० का फाइनलिस्टहरु सन्तोष, बार्ट भ्यान डेर ली, फिली आर्मिटेज म्याटिन र सन् २०१७ का फाइनलिष्ट जेमी पार्क थिए ।
सिरहा कर्जन्हाका सन्तोषले १८ विभिन्न नेपाली ‘भेगन’ खाना प्रस्तुत गरेका थिए । दोस्रो चरणको ‘फेस्टिभ फिस्ट’ मा उनले मौलिक परिकार कुखुराको तीते, तिलौरी, बिरिया, सात किसिमको तरुवा, भात, मासको दाल, गोलभेडाको चट्नी, कटर पोलेको, मालपुवा, बुनिया जस्ता विभिन्न नेपाली परिकार प्रस्तुत गरेका थिए ।
यसअघि तराईको खाना समेट्न नपाएका उनले यसपटक त्यो धोको पूरा गरे । सन्तोषले लामो समय नेपाल बस्दा आफ्नी आमाबाट सिकेको सीप यो पटक सदुपयोग गरेको बताए ।
निर्णायकहरुले सन्तोषको खानाको तारिफ गर्दै उनलाई जिताएनन् मात्र, एक निर्णायकले त आफूलाई पनि एकपटक नेपाल लैजान अनुरोध गरिन् ।
‘साे प्रतिस्पर्धामा जान चुनौतीपूर्ण थियो, मैले साहस र तयारी गरेर सफलता प्राप्त गरें,’ उनले भने, ‘यो नेपाल र समस्त नेपालीको जित हो । अब नेपाली परिकारलाई अन्तर्राष्ट्रिय स्तरमै चिनाउने मेरो धोकोले थप सार्थकता पाएको छ ।’
बीबीसीबाट प्रसारण हुने हस्पिटालिटी क्षेत्रमा विश्वकै प्रतिष्ठित टिभी रियालिटी शो ‘मास्टर सेफ प्रोफेसनल यूके’ मा नेपाली खाना लिएर उपविजेता बनेका सन्तोषको ख्याति गत वर्षदेखि देश-विदेशमा चुलिएको थियो ।
गत वर्ष ३२ चर्चित सेफबाट सुरु भएको साे प्रतियोगितामा साह विभिन्न मौलिक नेपाली परिकार विश्वमाझ चिनाउन सफल भए ।
उनको मौलिक नेपाली खाना पारखीहरुका लागि कुकबुक ‘आयला’ पनि प्रकाशित भएको छ ।
-1732541848.jpg)
