काठमाडाैं । एनएमबी बैंकले १३.५ मेगावाट तथा १२ मेगावाटका क्रमशः सुपर कावेली खोला -ए जलविद्युत आयोजना तथा सुपर कावेली खोला क्यासकेड जलविद्युत आयोजनाहरुको मुख्य लगानीकर्ता भई वित्तीय व्यवस्थापन गरेको छ।
प्रदेश १ अन्तर्गत ताप्लेजुङ्ग जिल्लामा रहेको सिरिजङ्घा गाउँपालिकामा निर्माण भइरहेको सुपर कावेली खोला -ए जलविद्युत आयोजना तथा सुपर कावेली खोला क्यासकेड जलविद्युत आयोजनाहरु क्रमश स्नो रिभर्स प्राइभेट लिमिटेड तथा हिल्टन हाइड्रो इनर्जीले निर्माण गरिरहेको हो।
यस आयोजनाहरुमा एनएमबी बैंक अगुवा बैंक रहेको छ। भने सह-वित्तीयकरणमा सहभागी अन्य बैंकमा राष्ट्रिय वाणिज्य बैंक रहेको छ।
१३.५ मेगावाट (सुपर कावेली खोला - ए जलविद्युत आयोजना) तथा १२ मेगावाट (सुपर कावेली खोला क्यासकेड जलविद्युत आयोजना) क्षमता भएको आयोजनाहरुको कुल लागत क्रमशः २अर्ब ४१ करोड तथा २ अर्ब १४ करोड रुपैयाँ छ। जसमध्ये बैकहरुको लगानी क्रमशः १ अर्ब ८९ करोड तथा १ अर्ब ६७ करोड रुपैयाँ रहने जानकारी गराइएको छ। यो आयोजनासमेत एनएमबी बैंकले कुल ४३ वटा जलविद्युत आयोजनाहरुमा लगानी गरिसकेको छ।
नेपाल राष्ट्र बैंकबाट जारी वातावरणीय तथा सामाजिक न्यूनीकरण गाइडलाइन २०१८ को निर्देशनअनुसार एनएमबी बैंकले वातावरणीय तथा सामाजिक नीति तयार पारी त्यसबमोजिम बैंकले पर्यावरण तथा सामाजिक व्यवस्थापन प्रणाली लागू गरिसकेको छ ।
एनएमबी बैंक द फाइनान्सियल टाइम्स लन्डनको ‘द ब्यान्कर’ पत्रिकाबाट एसियाकै सर्वाेत्कृष्ट बैंकको उपाधी ‘बैंक अफ द ईयर एसिया २०२१’ अवार्डबाट सम्मानित भएको छ। बैंकले सन् २०१७, २०१८, २०२० र २०२१ को लागि पनि उक्त पत्रिकाबाट चार पटक नेपालकै उत्कृष्ट बैंकको सम्मान ‘बैंक अफ द इयर नेपाल’ पनि प्राप्त गरिसकेको छ।
बैंकले हाल देशभर २ सय १ शाखा, १ सय ३८ एटीएम, नौ एक्सटेन्सन काउन्टरहरूमार्फत सेवा प्रदान गर्दै आइरहेको छ।
