काठमाडौं । नेपाल वायुसेवा निगमका नवनियुक्त कार्यकारी अध्यक्ष युवराज अधिकारीले पदभार ग्रहणकै क्रममा ग्राउण्डेड भएका सबै जहाजहरु सञ्चालनमा ल्याउन प्रतिबद्धता जनाएका थिए ।
वैंकल्पिक व्यवस्था नभएसम्म हाल ग्राउण्डेड भएका सबै जहाजहरुलाई सञ्चालन गर्ने प्रतिबद्धता जनाएका अध्यक्ष अधिकारीले अहिले सञ्चालन योग्य विमान पहिचानका लागि प्राविधिक खटाएका छन् ।
उनले सञ्चालन योग्य जहाज कुन कुन रहेको छन् र तीनिहरुको मर्मतसम्भारको लागि कति खर्च लाग्छ भन्ने प्रारम्भीक स्टामेटका लागि प्राविधिकहरुलाई परिचालन गरेका हुन् ।
हुन त संस्कृती, पर्यटन तथा नागरिक उड्डयनमन्त्री प्रेमबहादुर आलेले पनि पदभार ग्रहणकै क्रममा सञ्चालन गर्न मिल्ने जति सबै जहाजहरु सञ्चालनमा ल्याउने र नयाँ जहाजहरु थप गर्ने योजना सुनाएका थिए ।
आन्तरिक उडानलाई प्रतिस्पर्धी बनाउदै दुर्गम क्षेत्रमा सेवा दिने उद्धेश्यका साथ तत्कालका लागि ग्राउण्डेड गरिएका सबै जहाजहरु सञ्चालनमा ल्याउने गरी आवश्यक तयारी भइरहेको कार्यकारी अध्यक्ष अधिकारीले जानकारी दिए ।
निगम सञ्चालक समितिले २०७७ साउन १५ गतेबाट ६ वटै चिनियाँ जहाज सञ्चालन नगर्ने निर्णय गरेको थियो । त्यो बेला कार्यकारी अध्यक्षको रुपमा सुशील घिमिरे थिए भने सञ्चालकमा तत्कालिन कार्यकारी महाप्रबन्धक डिमप्रकाश पौडेल(हाल महाप्रबन्धक) सहितको सहभागिता रहेको थियो ।
तत्कालिन पर्यटनमन्त्री योगेश भट्टराईले निगम सुधारका लागि अध्ययन समिति समेत बनाएका थिए । सो समितिले बनाएको रिपोर्टमा पनि चिनियाँ जहाजले निगमलाई उल्टै घाटा गराएको रिपोर्ट बुझाएको थियो । हुन त सो अध्ययन समितिमा तत्कालिन कार्यकारी अध्यक्ष घिमिरे संयोजक थिए भने महाप्रबन्धक पौडेल समितिका सदस्य थिए ।
पछि उनिहरुलाई नै निगमको चाबी बुझाएका थिए । उनिहरुले निगमको नेतृत्व गरेपछि बसेको सञ्चालक समितिको बैठकले चिनियाँ जहाज सञ्चालन नगर्ने निर्णय गर्दै सबै जहाजहरु ग्राउण्डेड गरेको थियो ।
जहाजहरु लामो समयदेखि ग्राउण्डेड गरिए पनि त्यसको व्यवस्थापनमा भने चुक्दै आएको निगमले फेरि त्यसलाई सञ्चालन गर्ने तयारी गरिरहेको हो । हुन त अहिले पनि जहाजको खर्च भने निगमले तिर्दै आएको छ । ती जहाजहरुको बिमा, पाइलट, कर्मचारीहरु र पार्किङ शुल्क तिदै आएको छ ।
निगममा केहि साताअघि मात्र कार्यकारी अध्यक्षको जिम्मेवारी लिएर आएका अधिकारीले अर्को व्यवस्था नभएसम्मका लागि भएका मध्ये सञ्चालन योग्य रहेका जहाजहरुलाई सञ्चालन गर्ने तयारी गरिएको बताए । सञ्चालन नगर्दा पनि खर्च भइरहेको भन्दै थोरै खर्चमा मर्मत सम्भार गरेर मिल्ने खालका जहाजहरु तयार गर्न निर्देशन दिइएको बताइएको छ ।
‘कुन कुन जहाज सञ्चालन योग्य छन् र कति खर्च लाग्छ भन्ने स्टामेट प्राविधिकहरुसँग मागेको छु, अध्यक्ष अधिकारीले भने, छिटोभन्दा छिटो जहाज सञ्चालन गर्ने गरी काम अगाडी बढाउन निर्देशन दिएको छु’ ।
जुनमा खर्च कम हुन्छ त्यहि सञ्चालनमा ल्याउने भन्ने निर्देशन अनुसार चेकजाँच भइरहेको प्राविधिकहरुको भनाई छ । प्राविधिकहरुले १७ सीट क्षमताका ४ वटा वाइ १२ ई मध्ये २ वटा र ५६ सीट क्षमताका एमए ६० दुई वटा मध्ये १ वटा सञ्चालनको तयारी गरिरहेको छ ।
