काठमाडौं । पछिल्लो केही दिन यता सामाजिक सञ्जालमा एउटा भिडियो भाइरलजस्तै भयो । उक्त भाइरल भिडियो, भोजपुरी गीतको एउटा छोटो क्लिप हो । जसमा एक युवकले गीतमार्फत नै एउटा फोटो स्टुडियोको विज्ञापन गरिरहेका छन् ।
गीतमा देखिएको भिडियो वीरगन्ज जिल्ला अदालत नजिकको भगवती फोटो स्टुडियोको हो । जसलाई ११ वर्षदेखि स्थानीय युवा सन्तोष कुसाहाले सञ्चालन गरिरहेका छन् ।
सन्तोषले आफ्नो करिब डेढसय स्क्वायर फिटमा रहेको पसललाई ब्रान्डिङ्ग गर्ने उद्देश्यले गीत बनाएका थिए । गीत युट्य्बमा राखेपनि भिडियो बनाएका थिएनन् । त्यहि गीतको सानो क्लिपलाई नजिकका भाईलाई अभिनय गरेको भिडियो बनाउन लगाए । त्यहि भिडियो बनाएपछि टिकटकमा राखेपछि भ्यूज आउन थाल्यो ।
फोटो खिँच्ने, सम्पादन गर्ने, भिडियो सुटिङ तथा मिक्सिङ गर्ने, स्थानीय भोजपूरी भाषाको एल्बम सूटिङ गर्नेदेखि विवाह तथा विभिन्न कार्यक्रमहरुमा फोटो भिडियोको व्यवसायिक सेवा समेत स्टुडियोले दिदैँ आइरहेको छ । सन्तोषले पसलको भाडा मासिक ८ हजार तिर्दै आइरहेका छन् ।
अदालत जस्तो अति व्यस्त क्षेत्रको परिसरमा रहेको सन्तोषको व्यवसाय मज्जाले चल्छ । तर आफ्नो स्टुडियोलाई केही फरक तरिकाले प्रचार गरौं भन्ने हुटहुटी चलेपछि उनले गीतलाई माध्यम बनाए ।
भोजपुरी गीत लेख्दै आएका आफ्ना नजिकका भाई बिक्की कुसुहालाई गीत लेख्न लगाएर उक्त गीतलाई अर्का छिमेकी भाई ब्रिजलाल यादवलाई गाउन लगाए । ६ महिना अगाडी उक्त गित एउटा एल्बम सहित जेबी म्युजिक नामको युट्युब च्यानलमार्फत सार्वजनिक भयो । गीत सबै नजिकका साथीभाईसँग मिलेर गर्दा जम्मा २ हजार खर्च भएको सन्तोष बताउँछन् ।
‘भगवती स्टुडियोमा फोटो खिचवाउ’ बोलको यो गीत ३ मिनेट १४ सेकेण्डको छ । युट्युबमा आउँदा यो गीतबारे कसैलाई थाहा नै थिएन । तर गत साता सन्तोषले उक्त गीतको केही सेकेण्डको क्लिपलाई टिकटकमा राखेपछि सामाजिक सञ्जालमा भाइरल बन्यो ।
टिकटकपछि फेसबुकका ट्रोल पेजमा स्थान पाएको सन्तोषको प्रचार सामाग्रीलाई धेरैले अनेकन प्रतिक्रिया व्यक्त गरेका छन् ।
आफ्नो स्टुडियोको गित एकाएक सामाजिक सञ्जालभरी भाइरल बनेपछि सन्तोष आश्चर्य र हर्षित दुबै छन् ।
‘हामी जस्तो वीरगन्जको एउटा सामान्य स्टुडियोको गीत यसरी सामाजिक सञ्जालभरी भाइरल भइदिदाँ धेरै खुशी लागेको छ,’ सन्तोषले भने ।
गीत भाइरल बनेपछि दिनमा १५, २० ओटा फोन कलहरु भगवती फोटो स्टुडियोबारे सोध्ने मानिसहरुको आईरहेको उनी सुनाउँछन् ।
जुन प्रयोजनका लागि गीत निकालेको थियो त्यसले सार्थकता पाएको अहिले उनलाई महसुस हुन थालेको छ । सामान्य परिवारका सन्तोष र उनका भाईले विगत ११ वर्षदेखि फोटो स्टुडियो सञ्चालनमा ल्याएका हुन् ।
उनको स्टुडियोमा दैनिक ग्राहकहरुको भीड बाक्लिन थालेको छ । यसबाहेक सन्तोषले पछिल्लो समयमा अत्याधुनिक भिडियो सूटिङ प्रविधि ड्रोन समेत प्रयोग गर्न थालेका छन् । उनले ५० हजार देखि एक लाखसम्मका विभिन्न स्थानीय भिडियो तथा फोटो प्रोजेक्टमा काम गरिसकेको बताउँछन् ।
सन्तोष कुसाहा त एक उदाहरण मात्र हुन् । पछिल्लो समय व्यापारिक तथा व्यवसायिक प्रचार प्रयोजनका लागि समेत प्रयोग हुने टिकटकले धेरै साना घरेलु तथा मझौला व्यवसायहरुलाई आफ्नो सेवाको प्रचार प्रसारमा सहयोग पुर्याएको छ ।
