विराटनगर । ‘द बर्गर हाउस एण्ड क्रञ्चिफ्राइड चिकन’ को आउटलेट सिन्धुलीमा सञ्चालनमा आएको छ । हास्यव्यंग्य कलाकार दिनेश काफ्ले आउटलेट सिन्धुलीमा भित्र्याएका हुन् । ‘द बर्गर हाउस एण्ड क्रञ्चि फ्राइड चिकन’को सुरुवात एक वर्ष अघिदेखि सुरु भएको भए पनि कोरोनाको कारण भर्खरै सञ्चालनमा आएको हो ।
युवा पुस्तामा एकदमै लोकप्रिय रहेको ‘द वर्गर हाउस एण्ड क्रञ्चिफ्राइड चिकन’ एउटा राष्ट्रिय ब्रान्ड हो । काफ्लेले १२ लाख रुपैयाँमा आउटलेट किनेर सिन्धुलीमा भित्र्याएका हुन ।
सिन्धुलीको कमलामाई नगरपालिका-६ रातमाटामा उक्त हाउस सञ्चालनमा छ । ‘हाम्रो लक्षित वर्ग युवा हुन्’, उनले भने, ब्राण्ड कन्सियस र गुणस्तरीय सेवा प्रदान गर्न पनि खोलेका हौं ।’ यती ठूलो लगानीको यो किसिमको सुविधासम्पन्न र पारिवारिक जमघट गर्न सकिने सिन्धुलीको पहिलो फाष्टफुड हो ।
बर्गर हाउसमा क्रञ्चि बर्गर, कफी, फाष्टफुडसहित अर्डर अनुसारका परिकार पाइनेछ । एकपटकमा १२५ जनासम्मलाई सेवा दिने यस हाउसमा आकर्षक इन्टेरियर, सभाहल एवं रेष्टुरेण्ट एण्ड बार रहेको छ ।
डेढ करोड रुपैयाँको लगानीमा निर्माण सम्पन्न उक्त हाउसमा हाल २० जनाले प्रत्यक्ष रोजगारी पाएको सञ्चालक काफ्लेले बताए ।
काफ्लेले टिपिकल नेपाली खाना पाइने आफ्नै ‘नामको मधुवन नेपाली चुलो’ पनि सञ्चालन गरेका छन् ।
‘द बर्गर हाउस एण्ट क्रञ्चिफ्राइड चिकन’ मा फाष्टफुडका आइटम पाइन्छ । यस्तै नेपाली चुलोमा टिपिकल नेपाली खानाका परिकारहरु पाइने उनले जानकारी दिए । विशेषगरी सिन्धुलीमा उत्पादित कृषि उपजहरुलाई प्राथमिकतामा राखिएको उनले बताए ।
मार्सी चामलको भात, ढिंडो, लोकल कुखुराको मासुलगायत सिन्धुलीमा उत्पादित स्थानीयस्तरका उत्पादनलाई चुलोमा पकाइने र ग्राहकलाई लोकल परिकारको स्वाद चखाउने उद्देश्यले नेपाली चुलो पनि सञ्चालनमा ल्याएको काफ्लेले क्यापिटल नेपाललाई बताए ।
एक हप्तादेखि सञ्चालनमा आएको बर्गर हाउसको विधिवत् रुपमा भने नेपालीहरुको पर्व तीजको अवसरमा गरिने सञ्चालक काफ्लेले जानकारी दिए । ‘महिलाहरुको विशेष पर्व तीजको अवसर पारेर उट्घाटनको तयारी गरेका छौं’, उनले भने ‘उद्घाटन नगर्दै पनि ग्राहकको चाप बढिरहेको छ ।
उद्घाटन पश्चात अझ बढ्ने विश्वास छ ।’ युवा पुस्तादेखि पाका पुस्तासम्मका लागि उनीहरुको रोजाइका परिकार पाइने भएकाले पनि ग्राहकको आकर्षण बढ्ने अनुमान काफ्लेको छ ।
कलाकारिताबाट व्यवसायमा फड्को
२०६८ सालदेखि कलाकारितामा लागेका सिन्धुली भिमानका काफ्ने हास्यव्यंग्य विधामार्फत परिचित भएका छन् । छोटो समयमा आफूलाई कलाकारितामा स्थापित गरेका उनले कलाकारिता मात्र गरेर आफ्नो भविष्य नरहेको बुझे ।
कलाकारितासँगै केही गर्नुपर्छ भनेर उनले केही वर्षअघिदेखि सिन्धुलीको भिमानमा आफनै जग्गामा कलाकार कृषि तथा पशुपंक्षी फार्म सञ्चालनमा ल्याए । डेढ लाख लगानीमा स्थापना गरेको फार्ममा उनले अहिले ५ लाख रुपैयाँ पुर्याई सकेका छन् ।
अहिले कमलामाई नगरपालिकाको कृषि टनेल सहयोगबाट ५ लाख रुपैयाँ अनुदान लिएर उनले खेती गरिरहेका छन् । अहिले फर्म टमाटर, सागसब्जीलगायत छ । लोकल कुखुरा पनि रहेको उनले जानकारी दिए । व्यवसाय नै गर्ने भएपछि व्यवसायिक रुपमा गर्नुपर्छ भन्ने सोच आएर उनले बर्गर हाउस भित्र्याएका हुन ।
‘कलाकारिता भनेको क्षणिक हो, आफूले गर्न सक्दा मात्र हुन्छ, यसको कुनै भविष्य छैन’, उनले भने, ‘राज्यले पनि कलाकारितालाई उपेक्षा गरेको छ । पैसा कमाउन सकिन्छ तर दीर्घकालीन हुँदैन, कमाएका बेलामा बचायो भने भयो नत्र सकियो, कलाकारिताबाट मात्रै बाँच्न गाह्रो छ ।’ आम्दानीको नियमित आधार बनाउनको लागि केहि न केहि गर्नुपर्छ भन्ने लागेर व्यवसायमा लागेको उनको भनाइ छ ।
