ब्रसेल्स, एएफपी । अमेजन कम्पनीलाई युरोपेली सङ्घ (ईयू)को तथ्याङ्क सुरक्षासम्बन्धी कानून उल्लङ्घन गरेको अभियोगमा ८८.६६ करोड अमेरिकी डलर जरिवाना तोकिएको छ । त्यस्तो जरिवाना लक्जेम्बर्गको तथ्याङ्क सुरक्षासम्बन्धी राष्ट्रिय आयोगले जारी गरेको हो ।
खासगरी प्रविधि क्षेत्रको काम गर्ने यस कम्पनीले ईयूको कानूनसँग मेल नखानेगरी व्यक्तिगत तथ्याङ्कलाई छनोट गरेको दाबी गरेको छ ।अमेजनले भने तिर्नुपर्ने उक्त जरिवाना ‘तथ्यमा आधारित नरहेको’ बताउँदै आफूले यसको ‘जोडदार’ प्रतिरोध गर्ने जनाएको छ ।
लक्जेम्बर्गको तथ्याङ्क सुरक्षा निकाय, सीएनपीडीले १६ जुलाईमा त्यस्तो जरिबाना तिर्नुपर्ने सूचना जारी गरेको भएपनि यो अहिले चर्चामा आएको हो । ठूला प्रविधि कम्पनीहरूमाथि गोपनीयता र गलत सूचनालाई लिएर निगरानी बढाइनुपर्ने चासो उठिरहेका बेला यस्तो निर्णय आएको हो ।
अमेजनकी एक प्रवक्ताले ‘सेवाग्राहीको सूचना र विश्वासको सुरक्षा’ सुनिश्चित गर्नु आफूहरूको ‘उच्च प्राथमिकता’ भएको बताउँदै हल्लाका पछि नलाग्न सम्बन्धित सबैलाई आग्रह गरेका छन् ।
“कुनै तथ्याङ्कको दुरुपयोग भएको छैन र सेवाग्राहीका विवरण कुनै तेस्रो पक्षलाई दिइएको छैन,” उनले भने। “यी कुनै विवाद गर्न नपर्ने तथ्य हुन् ।” उहाँले आफ्नो कम्पनीले सीएनपीडीको निर्णयलाई बलियोसँग अस्वीकार गर्ने भन्दै त्यसको लागि पुनरावेदनमा जाने सोचेको जानकारी गराए ।
अमेजन र अमेरिकाका अन्य ठूला प्रविधि कम्पनीहरूले एकाधिकार कायम गर्न खोजेको भन्दै उनीहरूको त्यस्तो शक्तिमा अङ्कुश लगाउनुपर्ने आवाज उठ्ने गरेको छ।
यसअघि गुगल, ब्रिटिश एअरवेज, एचएन्डएम र मारिअट होटल्सजस्ता कम्पनीले कानुन मिचेको भन्दै युरोपेली सरकारहरूबाट जरिबाना खेपेका थिए। तर, तिनले तिरेको जरिबाना अहिलेको जस्तो विशाल परिमाणमा नभएर केही करोडमा थियो।
