काठमाडौं । सार्वजनिक खरिद पुनरावलोकन समितिको अध्यक्षमा हिमकुमार ओझा नियुक्त भएका छन् । सरकारका प्रवक्ता एवम् सञ्चारमन्त्री बसन्त नेम्वाङले ओझालाई नियुक्त गरेको जानकारी दिए ।
योसँगै सरकारले नेपाल इञ्जिनियरिङ परिषदको रजिष्ट्रारमा शिवमंगल गिरी नियुक्त भएका छन् ।
असार ७ गतेको बैठकले एसियाली विकास बैंकको कार्यकारी निर्देशकको कार्यालय मनिलामा २ वर्षे कार्यकालका लागि नेपालले प्रतिनिधित्व गर्ने निर्देशकको सल्लाहकारमा श्रम मन्त्रालयका उपसचिव रमेश अर्याललाई मनोनयन गरी काजमा पठाउने पनि निर्णय गरेको छ ।
असार १४ गते सार्वजनिक खरिद पुनरावलोकन समितिको सदस्यमा महेन्द्रबहादुर गुरुङ, राष्ट्रिय योजना आयोगको सदस्यमा राजबहादुर गिरीलाई नियुक्त गरिएको छ ।
त्यस्तै शिक्षा मन्त्रालयको प्रस्तावमा नेपाल विश्वविद्यालय पूर्वाधार विकास समितिको अध्यक्ष डा.अर्जुन कार्की, डा.अमिना सिंह, डा. असिम ढकाल, डा.विपिनचन्द्र अधिकारी, दिनेश शाह, दोभान राई, संगिता कौशल मिश्र, डा. सूर्यराज आचार्य, डा.उत्तमबाबु श्रेष्ठ, श्रवणकुमार राणा नियुक्त भएका छन् ।
योगमाया आयुर्वदिक विश्वविद्यालयको पूर्वाधार निर्माण समिति सदस्यमा खड्कबहादुर राई र वंशीधर लामा नियुक्त भएका छन् ।
सशस्त्र प्रहरी बल मानव स्रोत विभागका कार्यरत सशस्त्र प्रहरी अतिरिक्त महानिरीक्षक (एआईजीपी) पुष्पराम केसीलाई कार्य तथा सीमा सुरक्षा विभागका सरुवा गरिएको छ भने उनको ठाउँमा कार्य तथा सीमा सुरक्षा विभागमा कार्यरत एआईजीपी रामशरण पौडेललाई ल्याइएको छ ।
नेपाली सेनाका पाइलट सहायक रथी आशिष नरसिंह राणालाई पाइलट उपरथीमा बढुवा गरी पदस्थापन गर्ने निर्णय गरिएको पनि नेम्वाङले बताए ।
असार ७ कै बैठकले मदन भण्डारी औद्योगिक विश्वविद्यालय पूर्वाधार निर्माण विकास समितिको सदस्यमा प्रा. डा.मनिलराज कुलाक्षपती, डा.पदमबहादुर शाही र डा.अनिल पोखरेल नियुक्त भएका छन् ।
सीटीईभीटीको सदस्यसचिवमा जितनारायण काफ्लेलाई जिम्मेवारी दिइएको छ । राष्ट्रिय समाचार समितिको महाप्रबन्धकमा धनकुटाका सिद्धराज राई नियुक्त भएका छन् ।
-1732541848.jpg)
