पोखरा । पर्यटन प्रवर्द्धधनलाई विशेष प्राथमिकता दिँदै पोखरा महानगरले आगामी आर्थिक वर्षका लागि ६ अर्ब २७ करोड ७५ लाख रुपैयाँ को बजेट सार्वजनिक गरेको छ ।
विनियोजित बजेटमध्ये चालूतर्फ ६ अर्ब ९१ करोड रुपैयाँ अर्थात् ४६.४ प्रतिशत छुट्याइएको हो । पुँजीगततर्फ ३ अर्ब ३७ लाख रुपैयाँ अर्थात् ५३.६ प्रतिशत विनियोजन गरिएको छ । चालू आवका लागि ५ अर्ब ७२ करोड रुपैयाँको बजेट ल्याइएको थियो ।
नवौं सभामा महानगर उपप्रमुख मञ्जुदेवी गुरुङले प्रस्तुत गरेको बजेटले पर्यटन क्षेत्रलाई विशेष प्राथमिकतामा राखेको छ । पोखराको प्रमुख पर्यटकीय क्षेत्र फेवातालको वरिपरि पदमार्ग निर्माण गर्न १ करोड ५० लाख रुपैयाँ विनियोजन प्रस्ताव गरिएको छ ।
त्यसैगरी होमस्टेहरूको क्षमता विकास गर्ने, पर्यटन प्रवर्द्धधनमा निजी क्षेत्रका सङ्घ-संस्थाहरूसँग हातेमालो गर्ने, पर्यटन फेवातालको लागि फेस्टिभल, महोत्सव, तथा विशेष कार्यक्रम आयोजना गरिने कार्यक्रमलाई पनि समावेश गरिएको छ ।
प्रस्तुत बजेटमा आगामी आर्थिक वर्षमा पोखराको ‘पर्यटन गुरुयोजना’ तर्जुमा गरिने र पर्यटन विकासलाई थप प्राथमिकता दिन महानगरपालिकामा पर्यटन शाखा स्थापना गरिने उल्लेख छ । पर्यटन वसपार्क तथा अन्तर्राष्ट्रिय विमानस्थलमा पर्यटन सूचना केन्द्र स्थापना लागि पनि २० लाख रूपैयाँ विनियोजन गरिएको छ ।
त्यस्तै, पोखराको पर्यटनमा कोसेढुङ्गा सावित हुने विश्वास लिइएको पोखरा क्षेत्रका सात ताल जोड्ने गरी खाका तयार भएको साइकल रुटको प्रवर्द्धधन तथा विकासका लागि ५० लाख बजेट विनियोजन गरिएको छ ।
पोखरा २८ ठूलाकोटमा ‘अस्टोनोमी पार्क’ निर्माण गर्न प्रदेश सरकारसँग साझेदारी गरिने र पोखरा ६ मा रहेको बसुन्धरा र कोमागाने पार्कमा थप पूर्वाधार निर्माण गर्न १ करोड बजेट विनियोजन प्रस्ताव गरीएको छ ।
पोखराको भगिनीसम्बन्ध स्थापना भएका नगरहरूको सम्मेलन आयोजना गर्न नेपालका नियोगमार्फत् पहल गरिने जनाइएको छ । कोभिडको अवस्था मूल्याङ्कन गरी उक्त कार्यक्रम तर्जुमा गरिने र सो कार्यक्रम पोखराको पर्यटन प्रवर्द्धधनमा सार्थकसिद्ध हुने विश्वास गरिएको छ । त्यस्तै पोखरा टावर निजी क्षेत्रको समेत लगानीमा निर्माण गर्नेगरी संभाव्यता अध्ययन गरिने उल्लेख छ ।
सो कार्यक्रमको लागि १० लाख रुपैयाँ विनियोजन गरिएको छ भने पोखरा वडा नम्बर ४ को उपयुक्त स्थानमा ‘कोसेली घर’ निर्माणलाई पनि समावेश गरिएको छ । पर्यटनसँग जोडिएका पूर्वाधारहरू निर्माणमा निजी लगानी प्रोत्साहन गर्ने तथा कम लागतका पर्यटकीय पूर्वाधार तत्कालै निर्माण गर्नेजस्ता कार्यक्रमहरू सञ्चालन गरी समग्र पर्यटन क्षेत्रको विकास गरिने बजेटमा उल्लेख छ ।
