तनहुँ । व्यावसायिक क्यानोनिङको तयारीमा रहेको इलुङ झरनामा पूर्वाधार निर्माणको काम सुरु भएको छ । भीमाद नगरपालिका–९ पार्थदीमा रहेको झरनालाई पर्यटकीय गन्तव्यका रुपमा विकास गर्न नगरपालिकाको सहयोगमा पूर्वाधार निर्माणको काम सुरु भएको हो ।
नगरपालिकाको पाँच लाख रुपैयाँमा एक हप्तादेखि झरनासम्म पुग्ने बाटोमा सिँढी र रेलिङ निर्माणको काम सुरु गरिएको वडाध्यक्ष इमान थापाले जानकारी दिए । उनका अनुसार झरना जाने बाटोमा अप्ठ्यारो रहेको ठाउँमा सिँढी र रेलिङ निर्माण थालिएको छ ।
“झरना पुग्ने बेलामा झर्ने बाटो एकदमै अप्ठ्यारो रहेकाले पर्यटकलाई सहज होस् भन्ने उद्देश्यका साथ सिँढी निर्माण थालिएको छ”, उनले भने, “नगरपालिकाको आर्थिक सहयोग र स्थानीयवासीको जनश्रमदानमा यो काम सम्पन्न हुनेछ ।”
उक्त बाटोको ७७ मिटर भागमा ढुङ्गा छापेर सिँढी निर्माण गरिएको छ । दैनिक १५ भन्दा बढी स्थानीयवासी जनश्रमदानमा खटिएको स्थानीयवासी शिवकुमार आलेले जानकारी दिए । उनका अनुसार आगामी असोजदेखि उक्त झरनामा व्यावसायिकरूपमा क्यानोनिङ सञ्चालन गर्ने तयारी गरिएको छ ।
झरनामा पूर्वाधार विकासका लागि नगरपालिकाले चालू आर्थिक वर्ष २०७६/७७ मा १० लाख रुपैयाँ विनियोजन गरेको छ । उक्त रकमबाट क्यानोनिङका लागि आवश्यक सामग्री खरीद गरिनेछ । झरना नजिकै पर्यटकको सुविधाका लागि शौचालय र चेन्जिङरुम निर्माण गरिने वडाध्यक्ष थापाले जानकारी दिए ।
उनका अनुसार झरनामा व्यावसायिकरूपमा क्यानोनिङ सञ्चालन गर्नुपूर्व प्रशिक्षक बोलाएर तालिम सञ्चालन गरिनेछ । “झरनामा क्यानोनिङको सफल परीक्षण भइसकेको छ”, उनले भने “अब छिट्टै प्रशिक्षक बोलाएर यहाँका युवालाई क्यानोनिङसम्बन्धी तालीम दिने सोचमा छौँ ।”
चालीस मिटर अग्लो झरनामा गत मङ्सिर १६ गते सफल परीक्षण भएको थियो ।झरनामा आउने पर्यटकलाई बास बसाउन पार्थदी गाउँमा घरवास सुरु भइसकेको छ । पार्थदी गण्डकी प्रदेश सरकारले सञ्चालन गरेको मुख्यमन्त्री नमूना वातावरणमैत्री कृषि गाउँसमेत हो । यहाँका १० घरमा घरवास सञ्चालनमा छ ।
स्वच्छ वातावरण, चराचुरुङ्गीको चिरविराहटसँगै छङ्छङ्ती झरेको पानीको झरनाले यहाँ पुग्ने जोकोहीको मन लोभ्याउने गरेको छ । हरिनास गाउँपालिका–४ स्थित कटमराम्चेबाट बग्दै आएको सो खोलाको इलुङ झरनाबाट बनेको दहमा प्रत्येक वर्ष मङ्सिरमा झाँक्री पूजा गर्ने गरिएको स्थानीयवासी दिलबहादुर थापाले बताए । गाउँमा अनिष्ट नहोस्, बालीनाली राम्रो होस्, रोगव्याधी नलागोस् भनेर परम्परागतरूपमा गरिँदै आएको उक्त पूजामा भेँडा र कुखुराको सामूहिक बलि दिने प्रचलन छ ।
उक्त झरना पृथ्वी राजमार्गको शुक्लागण्डकी नगरपालिकास्थित खैरेनीटार बजारबाट २३ किमीको दूरीमा छ । खैरेनीटारदेखि एक घण्टाको मोटरसाइकल यात्रापछि झरनासम्म पुग्न सकिन्छ । खैरेनीटार बजारबाट भीमादसम्म सात किमी पक्की बाटो छ भने त्यहाँबाट झरनासम्म पुग्न ग्राभेल बाटो रहेको छ ।
