सेती नदी जलविद्युत आयोजनामा एचआईडीसीएलले इक्विटी लगानी गर्ने

मुख्य समाचार

गृहपृष्ठ
मुख्य समाचार

सेती नदी जलविद्युत आयोजनामा एचआईडीसीएलले इक्विटी लगानी गर्ने

क्यापिटल नेपालशुक्रबार, पुस २४, २०७७

काठमाडौं । हाइड्रो इलेक्ट्रिसिटी इन्भेष्टमेन्ट एन्ड डेभलपमेन्ट कम्पनी लिमिटेड (एचआईडीसीएल) ले कास्कीको माछापुछ्रे गाउँपालिकामा निर्माण भइरहेको २५ मेगावाटको सेती नदी जलविद्युत् आयोजनामा स्वपुँजी (इक्विटी) लगानी गर्ने भएको छ ।

आयोजनाको विकासकर्ता भिजन लुम्बिनी ऊर्जा विकास कम्पनी लिमिटेड र एचआइडिसिएलबीच शुक्रबार स्वपुँजी लगानी सम्झौता भएको हो । सम्झौतापत्रमा एचआईडीसीएलका प्रमुख कार्यकारी अधिकृत (सीईओ) छविराज पोखरेल र कम्पनीका अध्यक्ष जगतबहादुर पोखरेलले हस्ताक्षर गरेका छन् । एचआईडीसीएलले १८.५२ प्रतिशत अर्थात २० करोड रुपैयाँ स्वपुँजी लगानी गर्नेछ ।

एचआईडीसीएलले स्वपुँजी लगानी गरेको यो दोस्रो आयोजना हो । यसअघि रामेछापमा निर्माणाधीन ५७.५ मेगावाटको नुप्चे–लिखुमा कम्पनीले ५० करोड स्वपुँजी लगानी गरिसकेको छ ।

सेती नदीमा एनएमबी बैंकको अगुवाईमा ३ बैंक तथा वित्तीय संस्थाले ३ अर्ब ५० करोड रुपैयाँ ऋण लगानी सम्झौता गरेका छन् । एनएमबी बैंक एक्लैले आयोजनामा २ अर्ब २० करोड रुपैयाँ लगानी गर्दैछ । यस्तै, कर्मचारी सञ्चयकोषले ८० करोड र कृषि विकास बैंकले ५० करोड लगानी गर्नेछन् ।

आयोजना बनाउन ५ अर्ब रुपैयाँ लागत अनुमान गरिएको छ । २०७९ साउनभित्र निर्माण पूरा गरी विद्युत् उत्पादन गर्ने लक्ष्य छ । हालसम्म करिब २५ प्रतिशत निर्माण पूरा भइसकेको आयोजनाबाट वार्षिक १४ करोड ८० लाख युनिट बिजुली उत्पादन हुने अध्ययनले देखाएको छ ।

प्रकाशित मिति: शुक्रबार, पुस २४, २०७७ १३:०८

प्रतिक्रिया दिनुहोस्