काठमाडाैं । नेपाल विद्युत् प्राधिकरण वितरण केन्द्र लहानले लामो समयदेखि महसुल नबुझाउने १९ ग्राहकको विद्युत् लाइन काटेको छ । पटक–पटक विद्युत महसुल बुझाउन ताकेदा गर्दासमेत लामो समयसम्म महसुल नबुझाई अटेर गर्ने ग्राहकको लगत तयार गरी विद्युत् लाइन काट्न सुरु गरेको विद्युत् प्राधिकरण वितरण केन्द्र लहानका प्रमुख जितेन्द्रकुमार यादवले जानकारी दिए ।
लाइन काट्न सुरु गरेको दुई दिनभित्र १३ ग्राहकको लाइन काटिएको र थप ग्राहकहरुको विद्युत् लाइन काट्ने काम भइरहेको प्रमुख यादवको भनाइ छ । प्रमुख यादवका अनुसार पहिलो चरणमा ५० हजार रूपैयाँभन्दा बढी महसुल बक्यौता भएका ग्राहकको विद्युत् लाइन काट्न थालिएको छ ।
लामो समयदेखि ग्राहकले विद्युत् महसुल नतिर्दा प्राधिकरणले ३० करोड १६ लाख ३७ हजार २ सय ७ रूपैयाँ बक्यौता असुल्न बाँकी रहेको जनाएको छ ।
गार्हस्थ्य मिटरतर्फ १९ करोड १४ लाख ५ सय १६ रूपैयाँ, व्यापारिक मिटरतर्फ ९९ लाख ७१ हजार ४ सय ३९, गैरव्यापारिक मिटरतर्फ १ करोड ५८ लाख र औद्योगिक मिटरतर्फ ४ करोड २६ लाख ३८ हजार ८३५ रूपैयाँ बक्यौता रकम उठाउन बाँकी रहेको प्रमुख यादवले बताए।
सीमा नाका नखुले पनि भन्सार राजश्व बढ्यो
भारतीय सीमा नाका नखुले पनि भन्सार कार्यालय ठाडी सिरहाले चालु आर्थिक वर्ष २०७७/७८ को पाँच महिनाको अवधिमा रु चार करोडभन्दा बढी राजश्व सङ्कलन गरेको छ । कोरोना भाइरसको सङ्क्रमण फैलिन नदिन सरकारले भारतीय सीमा नाका बन्द गरेकै अवस्थामा ठाडी भन्सारले चालु आवको साउनदेखि मङ्सिरसम्मको अवधिमा ४ करोड ८९ लाख ४५ हजार रूपैयाँ राजश्व सङ्कलन भएको जनाएको छ ।
चालु आव २०७७/७८ मा ६ करोड ३० लाख लक्ष्य तोकिएकामा ५ महिनाकै अवधिमा लक्ष्यको करिब ६० प्रतिशत राजश्व सङ्कलन गर्न सफल भएको भन्सार प्रमुख नरेश साहले जानकारी दिए।
भारतबाट गहुँ, चामल, आलु, प्याज, फलफूल, बेसार र तरकारीलगायतका सामग्रीको आयात बढेको र खाद्यान्न सामग्री आयतमा भन्सार वृद्धि भएकाले राजश्व सङ्कलनमा वृद्धि भएको प्रमुख साहको कथन छ । अघिल्लो आव २०७६/७७ मा सो कार्यालयले ७ करोड १६ लाख ७९ हजार रूपैयाँ राजश्व सङ्कलन गरेको थियो ।
