काठमाडाैं । देशभर उच्च गतिको ब्रोडब्याण्ड इन्टरनेट पुर्याउने काम जारी छ । गत मंसिर मसान्तसम्म ७३ प्रतिशत जडान सम्पन्न भएको छ । नेपाल दूरसञ्चार प्राधिकरणले ग्रामीण दूरसञ्चार विकास कोषको रकम प्रयोग गरी ब्रोडव्याण्ड इन्टरनेट सेवा उपलब्ध गराउने काम जारी राखेको हो ।
यससम्बन्धी परियोजनालाई १८ वटा प्याकेज बनाएर सञ्चालन गरेको र हालसम्म ७२ दशमलव ९३ प्रतिशत जडान सम्पन्न भएको प्राधिकरणले जनाएको छ । विभिन्न १२ वटा प्याकेजअन्तर्गत देशका ४६ जिल्लामा तोकिए बमोजिमका स्थानमा जडान सम्पन्न भएको प्राधिकरणका प्रवक्ता मीनप्रसाद अर्यालले जानकारी दिए ।
उनका अनुसार १८ प्याकेजका १५ हजार ९ सय ८२ स्थानमध्येमा हालसम्म ११ हजार २ सय १३ स्थानमा इन्टरनेट जडान सम्पन्न भएको छ । हालसम्म ५ सय १२ स्थानीय निकायमा इन्टरनेट जडान सम्पन्न भएको छ । यसैगरी ५ हजार ९ सय ३३ वडा कार्यालयमध्येमा हालसम्म ४ हजार २ सय १३ स्थान, ५ हजार २ सय २५ माध्यमिक विद्यालयमध्येमा हालसम्म ३ हजार ५ सय ५ स्थान र ४ हजार १ सय २२ स्वास्थ्य संस्थामध्येमा हालसम्म २ हजार ९ सय ८३ स्थानमा इन्टरनेट जडान सम्पन्न भएका छन् ।
प्राधिकरणको तथ्याङ्कअनुसार ४ हजार ७ सय ६९ स्थानमा जडानको कार्य बाँकी छ । प्राधिकरणको तथ्याङ्कअनुसार दुई वटा प्याकेजअन्तर्गतका ९ जिल्लामा ५० प्रतिशतभन्दा बढी, चार प्याकेजअन्तर्गतका १९ जिल्लामा नेटवर्क तथा कनेक्टिभिटी जडानका लागि सेवा प्रदायक छनोट भई निर्माण कार्य भइरहेको प्रवक्ता अर्यालले जानकारी दिए ।
उनका अनुसार सम्पन्न भइसकेका परियोजनामध्ये हालसम्म चार वटा परियोजनाको अनुगमन तथा प्रमाणीकरण कार्य सम्पन्न भइसकेको र दुईवटा परियोजनाको प्राधिकरणबाट नियुक्त परामर्शदाताबाट पहिलोचरण अन्तर्गतको अनुगमन तथा प्रमाणीकरण कार्य भइरहेको छ ।
यसैगरी ६ वटा परियोजनाको दोस्रोचरण अन्तर्गतको अनुगमन तथा प्रमाणीकरण कार्य भइरहेको तथा दुईवटा परियोजनाको अनुगमनको कार्य भइरहेको छ । त्यसमध्ये गत मंसिर मसान्तसम्म ४६ जिल्लामा सतप्रतिशत र बाँकी ९ जिल्लामा ५० प्रतिशत काम सम्पन्न भइ इन्टरनेट सेवा सञ्चालनमा आएको छ । त्यस्तै चारवटा प्याकेजअन्तर्गत १९ जिल्लामा नेटवर्क तथा कनेक्टिभिटी जडानका लागि सम्झौता भइसकेको प्राधिकरणले जनाएको छ ।
कुल ५ अर्ब २६ करोड ९७ लाख ७० हजार रुपैयाँमध्येमा हालसम्म २ अर्ब ७४ करोड रुपैयाँ ब्रोडब्याण्ड परियोजनाको लागि सेवा प्रदायकलाई भुक्तानी गरिएको उनले बताए।
उनका अनुसार उक्त परियोजनाअन्तर्गत देशभरका नगरपालिका, गाउँपालिका, वडा कार्यालय, शैक्षिक संस्था तथा स्वास्थ्य संस्थामा निःशुल्क ब्रोडव्याण्ड इन्टरनेटसेवा उपलब्ध गराउन लागिएको हो ।
प्राधिकरणले सो कोषअन्तर्गत ब्रोडव्याण्ड इन्टरनेट विस्तारमा काठमाडौँ उपत्यकाका काठमाडौँ, ललितपुर र भक्तपुर जिल्लालाई समेटेको छैन ।
