बिजुलीको माग १०० मेगावाट बढ्यो, व्यवस्थापन गर्न विद्युत् प्राधिकरणलाई चुनौती

अर्थतन्त्र

गृहपृष्ठ
अर्थतन्त्र

बिजुलीको माग १०० मेगावाट बढ्यो, व्यवस्थापन गर्न विद्युत् प्राधिकरणलाई चुनौती

क्यापिटल नेपालमंगलबार, पुस १४, २०७७

काठमाडौं । गत वर्षको भन्दा यो वर्ष बिजुलीको माग झण्डै १०० मेगावाट बढेको छ । हाल बिजुलीको माग बढेर १४३० मेगावाट पुगेको छ । गत वर्षको यही समयमा बिजुलीको माग १३४० मेगावाट मात्र रहेको नेपाल विद्युत प्राधिकरणले जनाएको छ ।

चिसो बढ्दै गएकाले बिजुलीको माग अझै हुने अनुमान विद्युत् प्राधिकरणको छ । विद्युत् प्राधिकरणका आयोजनाहरुबाट ५१६ मेगावाट, निजी उत्पादकहरुबाट ३२० मेगावाट आपूर्ति भएको छ । यस्तै भारतबाट ५९४ मेगावाट बिजुली आयात भएको प्राधिकरणले जनाएको छ ।

लोडसेडिङ हटाउन भारतबाट आयात हुने बिजुलीको प्रमुख भुमिका रहँदै आएको छ । गत वर्षको यही समयमा प्राधिकरणका आयोजनाबाट ५०८, निजी उत्पादन ३०४ मेगावाट आपूर्ति भएको थियो । त्यसबेला भारतबाट ४९८ मेगावाट बिजुली आयात भएको छ ।

गत वर्षको भन्दा यो वर्ष भारतबाट बिजुली आयात १०० मेगावाट बढेको देखिएको छ । माग बढेको तर आन्तरिक उत्पादन थपिन नसक्दा माग सन्तुलन कायम गर्न विद्युत प्राधिकरणलाई हम्मे परेको छ ।

सोमबार मध्यमस्र्याङदी जलविद्युत् आयोजनाको एउटा युनिटमा प्राविधिक समस्या आएर ३० मेगावाट बिजुली कम हुँदा प्रणालीमा असन्तुलन आयो र बिजुली आपूर्ति केही समय बन्द भयो ।

गत वर्षको भन्दा यो वर्ष बिजुलीको माग बढेको प्राधिकरणका कामु कार्यकारी निर्देशक हितेन्द्रदेव शाक्य बताउँछन् । उनले माग बढे पनि व्यवस्थापन भइरहेको सुनाए । गत वर्षको भन्दा यो वर्ष बिजुलीको लाइन ट्रिपिड र सटडाउन कम देखिएको जानकारी दिए ।

प्रकाशित मिति: मंगलबार, पुस १४, २०७७ ०८:३३

प्रतिक्रिया दिनुहोस्