गण्डकी प्रदेशमा गत आवमा २ लाख ९८ हजार ९ सय विदेशी पर्यटक

मुख्य समाचार

गृहपृष्ठ
मुख्य समाचार

गण्डकी प्रदेशमा गत आवमा २ लाख ९८ हजार ९ सय विदेशी पर्यटक

क्यापिटल नेपालआइतबार, साउन १२, २०७६

पोखरा । गण्डकी प्रदेशमा आर्थिक वर्ष २०७५/७६ मा २ लाख ९८ हजार ९ सय ७५ विदेशी पर्यटक आएका छन् । उद्योग, पर्यटन वन तथा वातावरण मन्त्रालय गण्डकी प्रदेशले पोखरा र आसपासका जिल्लामा प्रवेश गरेका पर्यटकको विवरण सङ्कलनबाट सो तथ्याङ्क बाहिर ल्याएको हो ।

यसअघि पोखरामा कति पर्यटक आउँथे भन्ने आधिकारिक तथ्याङ्क कहीँ कतै थिएन । नेपाल आएका झण्डै ४० प्रतिशत पर्यटक पोखरा आउँछन् भन्ने पर्यटन सम्बद्ध व्यक्ति एवम् संस्थाहरुले अनुमान लगाउँदै आएका थिए । प्रदेश सरकार गठनसँगै अघिल्लो आर्थिक वर्ष २०७४/७५ बाट तथ्याङ्क सङ्कलनको प्रक्रिया थालिएको गण्डकी प्रदेशका उद्योग, पर्यटन, वन तथा वातावरण मन्त्रालयका सूचना अधिकृत शिव परियारले जानकारी दिए ।

तथ्याङ्कअनुसार पोखरामा सबैभन्दा धेरै कात्तिकमा ३८ हजार ५ सय ७५ पर्यटक आएका छन् । सबैभन्दा कम असारमा १२ हजार ६ सय २ पर्यटक आएको प्रदेश सरकारको तथ्याङ्मा छ । गण्डकी प्रदेशमा आउने पर्यटकमध्ये सबैभन्दा धेरै छिमेकी राष्ट्र भारतका छन् । तथ्याङ्कअनुसार हवाई मार्ग र स्थल मार्ग हुँदै आउने भारतीय पर्यटकको सङ्ख्या १ लाख २० हजार ९ सय ३८ रहेको सूचना अधिकृत परियारले जानकारी दिए । त्यसैगरी १ लाख ७८ हजार ३७ पर्यटक अन्य मुलुकबाट आएको तथ्याङ्क छ ।

स्थलमार्गबाट आउने पर्यटकको तथ्याङ्क पृथ्वी राजमार्गको आँबु खैरेनी प्रहरी चेकपोस्ट र स्याङ्जाको गल्याङ प्रहरी चेकपोस्टमा रहेका प्रहरीले राख्दै आएका छन् । हवाई मार्गबाट आउने पर्यटकको पोखरा विमानस्थलबाट तथ्याङ्क सङ्कलन गरिएको छ । गण्डकी प्रदेशको नवलपुरमा आउने पर्यटकको तथ्याङ्क भने यस तथ्याङ्कमा समेटिएको छैन ।

प्रदेश सरकारले आन्तरिक पर्यटक भ्रमण भनेर २०१९ मनाइरहँदा बितेको ६ महिनामा गण्डकी प्रदेशमा कति आन्तरिक पर्यटक आए भन्ने तथ्याङ्क छैन ।

जमुना वर्षा शर्मा/रासस

प्रकाशित मिति: आइतबार, साउन १२, २०७६ १७:१९

प्रतिक्रिया दिनुहोस्