काठमाडौं । भौतिक पूर्वाधार निर्माणको क्षेत्रमा सक्रिय निर्माण व्यवसायीहरुलाई अज्ञात समूहबाट निरन्तर हतोत्साहित गर्ने गरी भइरहेका हिंसात्मक घटनाहरुप्रति आफ्नो गम्भीर ध्यानाकर्षण भएको नेपाल निर्माण व्यवसायी महासंघले जनाएको छ ।
मंगलवार राति करिब सवा १० बजे रोल्पा प्युठान जोड्ने घोडाखोलाको पुल निर्माण आयोजनामा किनारामा पार्किङ गरी राखिएका स्क्याभेटरहरुमा आगजनी गरिएको महासंघले बुधबार निकालेको विज्ञप्तिमा उल्लेख छ ।
जलजला÷आँसु÷जय माँ निर्माण सेवाका संचालक तथा महासंघका कार्यसमिति सदस्य बालाजु श्रेष्ठको स्क्याभेटरहरुमा अज्ञात समुहबाट आगजनी गरिएकोमा चार वटा जलेर नष्ट भएको र बाँकी एउटमा आशिंक क्षति पुगेको छ ।
रा१ क ३६७ नम्बरको स्क्याभेटरमा आगजनी गरिँदा करोडौको क्षति भएको महासंघले जनाएको छ । ती स्क्याभेटरहरु कल्याणकोट-कालाकाटे गढवा सिक्टा हुलाकी सडक निर्माणमा प्रयोग हुँदै आएका थिए ।
उक्त सडक खण्डको निर्माण बज्रगुरु कान्छाराम कन्स्ट्रक्शन जेभीले गरिरहेको थियो । निर्माण व्यवसायी र उनीहरुका उपकरणहरुको सुरक्षालाई लिएर महासंघले पटक-पटक प्रधानमन्त्री, मन्त्रीहरु, सुरक्षा निकायका प्रमुखहरु सहित सरोकारवाला सबैको ध्यानाकर्षण गराइरहँदा समेत अज्ञात समूहहरुको हिंसात्मक गतिविधिमा कुनै कमी नआउनु ठूलो चिन्ताको विषय भएको महासंघको भनाइ छ ।
यस्तै सिलसिला जारी रहेमा देशभरका निर्माण कार्य ठप्प पारी महासंघ सशक्त आन्दोलनमा जान बाध्य हुने महासंघका महासचिव रोशन दाहालद्धारा जारी विज्ञप्तिमा उल्लेख छ ।
दोषीलाई तत्काल पक्राउ गरी कडाभन्दा कडा सजाय दिन र सम्बन्धित् निर्माण कम्पनीहरुलाई क्षतिपूर्ति दिन महासंघले जोडदार माग गरेको छ ।
साथै देशभरका निर्माण व्यवसायी र उनीहरुका उपकरणको सुरक्षाको भरपर्दो व्यवस्था मिलाउन महासंघले पुनः एक पटक सरोकारवाला सबैको ध्यानाकर्षण गराएको छ ।
