काठमाडौं । संविधान दिवसका अवसरमा ३० जना उद्योगी व्यवसायीहरु विभिन्न मानपदवी, अलंकार र पदकद्धारा विभूषित भएका छन् । विभूषित हुनेमा नेपाल उद्योग वाणिज्य महासंघका अध्यक्ष शेखर गोल्छा र नेपाल उद्योग परिसंघका अध्यक्ष विष्णुकुमार अग्रवाल छन् ।
गोल्छा र अग्रवाल सुप्रवल जनसेवाश्री पदवीबाट विभूषित भएको गृह मन्त्रालयले जनाएको छ । पदकद्धारा विभूषित हुनेमा उद्योगी राजेन्द्रकुमार खेतान, शिवरत्न सारडा, मोतीलाल दुगड, साहिल अग्रवाल, ध्रुवकुमार श्रेष्ठ छन् ।
डा. उपेन्द्र महतो, देवीप्रकाश भट्टचन, कैलाश सिरोहिया, रामेश्वर थापा, विनोदराज ज्ञवाली, सुरेन्द्रवीर मालाकार, राजु ढकाल, गोकुल भण्डारी, अर्जुनमान सैंजु, गोविन्द गोयन्का, नारायण अग्रवाल, कुञ्ज अग्रवाल र अम्बिकाप्रसाद पौडेल पनि विभूषित भएका छन् ।
निर्माण व्यवसायी रमेश शर्मा, सञ्जयकुमार खेतान, सौरभ दुगड, देवकृष्ण मुण्दडा र कमलकिशोर मालपानी पनि विभूषित भएको मन्त्रालयले जनाएको छ ।
बैंकरहरुमा नबिल बैंकका अध्यक्ष उपेन्द्र पौडेल र मेगा बैंककी डेपुटी सीईओ रविनादेशराज श्रेष्ठ छन भने बिमाबाट एनएलजी इन्स्योरेन्सका प्रमुख कार्यकारी अधिकृत (सीईओ) सुनिलबल्लभ पन्त र शिखर इन्स्योरेन्सका सीईओ दिपप्रकाश पाण्डे पनि विभुषित भएका छन् ।
राष्ट्रपतिद्वारा ९ सय ३ जनालाई विभूषण प्रदान
संविधान दिवसका अवसरमा राष्ट्रपति विद्यादेवी भण्डारीले ९ सय ३ जनालाई विभिन्न विभूषण, अलङ्कार र पदक प्रदान गरेकी छिन् ।
नेपालको संविधानको धारा २७७ को उपधारा ९१० बमोजिम गत भदौ २९ गतेको मन्त्रिपरिषद्का सिफारिसमा उनले ती विभूषण प्रदान गरेकी हुन् ।
राष्ट्रपति भण्डारीले नेपाल रत्न एक जनालाई, राष्ट्र गौरव दुई जनालाई, महाउज्ज्ल राष्ट्रदीप प्रथम श्रेणी पाँच जनालाई, सुप्रसिद्ध प्रवल जनसेवाश्री प्रथम श्रेणी पाँच जनालाई, उज्ज्वल कीर्तिमय राष्ट्रदीप द्वितीय श्रेणी एक जनालाई, प्रसिद्ध प्रवल जनसेवाश्री द्वितीय श्रेणी २४ जनालाई, सुकीर्तिमय राष्ट्रदीप तृतीय श्रेणी ३९ जनालाई, सुप्रवल जनसेवाश्री तृतीय श्रेणी १६१ जनालाई, कीर्तिमय राष्ट्रदीप चतुर्थ श्रेणी आठ जनालाई, प्रवल जनसेवाश्री चतुर्थ श्रेणी ३१९ जनालाई र जनसेवाश्री पञ्चम श्रेणी १९० जनालाई प्रदान गरेको राष्ट्रपतिको कार्यालयले जनाएको छ ।
यसैगरी राष्ट्र यशोवद्र्धक अलङ्कार चार जनालाई, नेपाल सेवा प्रवीण दुई जनालाई, समाजसेवा रत्न २१ जनालाई, नेपाल प्रताप सुभूषण ३४ जनालाई, अतिपौरख भास्कर सात जनालाई, नेपाल प्रताप आभूषण २४ जनालाई, महापौरख भास्कर तीनजनालाई र नेपालप्रताप भूषण १६ जनालाई प्रदान गरेकी छिन् ।
राष्ट्रपतिले राष्ट्रसेवा पदक प्रथम श्रेणी तीनजनालाई, सुकीर्ति पदक १० जनालाई, सगरमाथा पदक सात जनालाई, वीरता पदक सात जनालाई, विकासरत्न पदक एकजनालाई र प्राकृतिक प्रकोप पीडितोद्धार पदक नौ जनालाई प्रदान गरेकी छिन् ।