बुधबार, साउन १३ २०७८ ०९:०५ AM

×

ट्र्याक खोलेको ४३ वर्षपछि कालोपत्रे गरिँदै

images

काठमाडौं । प्रसिद्ध धार्मिकस्थल जाने छाब्दी मार्गदेखि उत्तरतर्फ रहेको चारकुने–भदुरडाँडा, मुसेखोला हुँदै पृथ्वीराजमार्ग जोडिने ट्र्याक खोलेको करिब ४३ वर्षपछि कालोपत्रेको सुरुआत गरिएको छ । 

व्यास नगरपालिका–१ चारकुनेस्थित छाब्दी मार्गबाट राजमार्ग जोडिने सडक सदरमुकाम दमौलीबाट करिब डेढ किलोमिटरको दूरीमा रहे पनि बत्तीमुनिको अँध्यारो जस्तै बन्दै आएको थियो । विसं २०३५ मा ट्र्याक खोलिएको सो मार्गको दूरी करिब पाँच किलोमिटर रहेकाले पक्की नालासहित कालोपत्रे गर्न सुरु भएपछि स्थानीयबासी खुशी भएका छन् । 

हिउँदमा धुलो र वर्षायाममा हिलोले सास्ती खेप्नुपरेको चारकुनेबासीले त्यसको अन्त्य हुने विश्वास गरेको स्थानीयवासी एवं नेकपा एमाले केन्द्रीय सदस्य प्रतापलाल श्रेष्ठले बताए। साे मार्गमा कालोपत्रे गर्न १५ लाख रूपैयाँ बजेट निकासाका लागि केन्द्रीय सदस्य श्रेष्ठले महत्वपूर्ण भूमिका निर्वाह गरे ।  

“यो मार्ग पहिल्यै कालोपत्रेका लागि सुरुआत हुनुपर्ने हो”, उनले भने, “जनप्रतिनिधिले चासो दिएर काम नगरिदिँदा अलपत्र बन्दै आएको थियो ।” हाल कालोपत्रे गर्न लागिएको सडकमा आधारभूत स्वास्थ्य कार्यालय भवन निर्माण गरी वडा कार्यालयले सेवा प्रवाह गर्दै आएको छ ।

वडा कार्यालयको भवन निर्माण कार्य अन्तिम चरणमा रहेकाले केही समयका लागि वडा कार्यालयले स्वास्थ्य कार्यालयको भवन प्रयोग गरेको हो । “वडा तथा स्वास्थ्य कार्यालयसम्म नगरपालिकाले चासो देखाउनुपर्ने हो तर देखाएनन्”, श्रेष्ठले भने, “गण्डकी प्रदेशका आन्तरिक मामिला तथा कानुनमन्त्रीसँग भनेर बजेट ल्याएको हुँ ।”

साे मार्गमा २२६ मिटर नालामध्ये हाल १०७ मिटर सम्पन्न भइसकेको चारकुने टोल विकास संस्थाका अध्यक्ष एवं भदु्रमार्ग निर्माण समितिका संयोजक राजेन्द्र श्रेष्ठले जानकारी दिए । उनका अनुसार नाला निर्माणका लागि वडा कार्यालयले ४ लाख रूपैयाँ बजेट विनियोजन गरेको छ ।

यस वर्ष कुल २३१ मिटर सडकमध्ये १०७ मिटर ग्रावेल र १२४ मिटर छ मिटर चौडाको कालोपत्रे सडक हुनेछ । कालोपत्रे गरिने क्षेत्रमा ग्राभेल बिच्छ्याएर रोलर लगाउने कार्य भइरहेको अध्यक्ष श्रेष्ठले बताए। भदुरमार्ग ग्राभेल तथा कालोपत्रे गरेपछि व्यास–१ का बासिन्दालाई पृथ्वीराजमार्ग निस्कन सदरमुकाम दमौली हुँदै जानुपर्ने झन्झटको अन्त्य हुने भएको छ । रासस

सोमबार ३१ जेठ २०७८ ०९:०३ AM मा प्रकाशित

प्रतिक्रिया