दमौली । तनहुँको बन्दीपुर गाउँपालिकामा निर्माण हुन लागेको केबलकारको ‘बटम स्टेसन’ भवन निर्माण सुरु भएको छ । केबलकारको साझेदारी कम्पनी आरकेडी रियल स्टेट एन्ड कन्स्ट्रक्सन लिमिटेडका अध्यक्ष रामचन्द्र शर्माले निर्माण गर्न लागिएको उक्त भवन आज शिलान्यास गरेका हुन् ।
बन्दीपुर गाउँपालिका–४ ठूल्ढुङ्गामा १८ करोड ५५ लाख रूपैयाँको लागतमा निर्माण गर्न लागिएको उक्त भवन १५ महिनामा सम्पन्न गर्ने लक्ष्य लिइएको उनले जानकारी दिए । उक्त लिमिटेड, पञ्चासे केबलकार एन्ड टुर्स लिमिटेड, टुरिज्म इन्भेष्टमेन्ट फन्ड र बन्दीपुर गाउँपालिकाको साझेदारीमा एक अर्ब ३८ करोड रूपैयाँको लागतमा बन्दीपुर पर्यटन पूर्वाधारयुक्त परियोजना पनि निर्माण निर्माण गर्न लागिएको छ ।
केबलकारको टप स्टेसनमा १० तल्लाको होटलसहितको भवन निर्माण गरिनेछ । ८२ करोड रूपैयाँको लागतमा निर्माण हुने उक्त होटलमा आधुनिक भ्यू टावर, बेनक्युट हल र ८० कोठा रहने अध्यक्ष शर्माले जानकारी दिए ।
‘पहाडकी रानी’ नामले परिचित बन्दीपुर घुम्न आउने पर्यटकलाई मनोरञ्जन र सुविधा प्रदान गर्ने उद्देश्यले उक्त कम्पनीले विविध पूर्वाधार निर्माणको योजनाअनुसार कामलाई तीव्रता दिएको छ ।
५६ करोड रूपैयाँको लागतमा केबलकार निर्माण गरिने योजना रहेकामा उक्त कम्पनीले केबलकारमा आधुनिक ‘मोनोकेबल डिटाचेबल प्यासेन्जर सिस्टम’ जडान गर्ने र सुरक्षाको पक्षलाई महत्त्व दिएर सुरक्षा उपकरण जडान गर्ने योजना थपेको उनको भनाइ थियो ।
ठूल्ढुङ्गा स्वाँराबाट बरालथोकसम्म जोडिने केबलकारबाट एक घण्टामा २०० ले वारपार गर्न सक्नेछन् । विमलनगरस्थित सिद्धगुफा र प्राकृतिक दृश्यावलोकनका लागि बन्दीपुर घुम्न आउने पर्यटकका लागि केबुलकार आकर्षण बन्ने विश्वास लिइएको छ । ठूल्ढुङ्गा स्वाँराबाट सुरू हुने केबलकारले सिद्धगुफाको छेउ हुँदै बन्दीपुरको उचाइसम्म एक किलोमिटर ६०० मिटर यात्रा गर्नेछ । रासस
