काठमाडौं । लक्ष्मी सन्राइज बैंकले विराटनगरमा आफ्नो शाखा स्थानान्तरणमार्फत सेवा विस्तार गरेको छ।
विराटनगर महानगरपालिका वडा नम्वर–७ स्थित हनुमान दास रोडमा रहेका दुई शाखामध्ये एउटा शाखा ५ किलोमिटर उत्तरतर्फ सोही महानगरपालिकाको वडा नम्बर–३ स्थित पुष्पलाल चोकमा स्थानतरण गरिएको हो।
स्थानतरण गरिएको साविकको हनुमान दास रोडको शाखाका ग्राहकहरूले सोही ठाउँमा रहेको अर्को शाखामार्फत सेवा लिन सक्ने बैंकले जनाएको छ।
स्थानान्तरण भएसँगै लक्ष्मी सन्राइज बैंकले आफ्नो सेवा विस्तार गर्दै ग्राहकहरूमाझ बैंकिङ्ग सेवाको पहुँच अझ सहज बनाउने विश्वास लिएको छ। स्थानतरण भएको शाखाले ग्राहक तथा व्यवसायहरूलाई सबै प्रकारका रिटेल बैंकिङ सेवा प्रदान गर्नेछ।
साथै, आफ्ना ग्राहकहरूलाई थप व्यवस्थित र समुचित सेवा प्रदान गर्न बैंकले बिर्तामोडमा रहेका दुई वटा शाखा गाभी साविक सन्राइज बैंकको स्थान भद्रपुर लाइन, बिर्तामोड नगरपालिका–४, झापाबाट संयुक्त कारोबार सुरु गरेको छ। त्यसैगरी, चितवनस्थित भरतपुरको हाकिमचोकमा रहेका दुई वटा शाखा पनि गाभिई साविकको लक्ष्मी बैंकको स्थान हाकिमचोक, भरतपुर महानगरपालिका–१० बाट ग्राहकहरूलाई सेवा प्रदान गर्नेछ।
हाल लक्ष्मी सन्राइज बैंकका ५९ जिल्लामा २ सय ५६ शाखा, ३ सय १९ एटिएम, २८ एक्स्टेन्सन काउन्टर र १ सय ३० शाखारहित बैँकिङ एजेन्ट रहेका छन्।
