काठमाडौं । कोरोना सङ्क्रमणको जोखिम हुन नदिन सदरमुकाममा सञ्चालित बैंक तथा वित्तीय संस्थाले आलोपालो गरी सेवा दिने भएका छन् । आजदेखि लागू हुने गरी नेपाल बैंकले हप्ताको ३ दिन र अन्य बैंक तथा बिमा कम्पनी आलोपालो गरेर हप्ताको २ दिन मात्र खुल्ने छन् । नेपाल बैंकले आइतबार, मंगलबार र बिहीबार सेवा दिने जनाइएको छ ।
सदरमुकाममा २८ वाणिज्य/विकास बैंक र दर्जन बढी बिमा कम्पनी सेवारत छन् । न्यून कर्मचारीको उपस्थितिमा जनस्वास्थ्य मापदण्डको पूर्णपालना गरी बिहान ११ बजेदेखि दिउँसो १ बजेसम्म मात्र सेवा सञ्चालन गर्ने निर्णय भएको जिल्ला प्रशासन कार्यालयका प्रशासकीय अधिकृत गणेश गौतमले जानकारी दिए।
जिल्ला कोभिड–१९ सङ्कट व्यवस्थापन केन्द्रले बैंकर्स एसोसिएसन र वित्तीय संस्थाका प्रतिनिधिसँगको छलफलपछि आलोपालो र समयको निर्धारण गरेको हो । प्रभु बैंकले भने सरकारी कार्यालयसँग समन्वय गरी आवश्यकताअनुसार राजश्व काउण्टर सञ्चालन गर्ने जनाइएको छ ।
सबै बैंक एकसाथ खुल्दा सेवाग्राहीको भीडभाड हुने र कोरोना सङ्क्रमणको जोखिम बढ्ने हुँदा आलोपालो गरेर बैंक खोल्ने निर्णय गरिएको बैंकर्स एसोसिएसनले जनाएको छ । एसोसिएसनले सेवा सञ्चालन गर्दा अनिवार्य रुपमा स्वास्थ्य सुरक्षा सावधानी अपनाउन सबै बैंकहरूलाई आग्रह गरेको छ ।
बागलुङ नगरपालिकामा मंगलबारदेखि १० दिनसम्मलाई निषेधाज्ञा जारी गरिएको छ । स्थानीय प्रशासनले खाद्यन्न, तरकारी, फलफूल, दूध, मासुलगायत दैनिक उपभोग्य वस्तुका पसल पनि बिहान ७ देखि १० बजेसम्म खोल्न दिने निर्णय गरेको छ । अन्य पसल, व्यवसाय बन्द छन् । अत्यावश्यक बाहेकका सवारीसाधन पनि ठप्प छन् ।
कोरोना सङ्क्रमितको सङ्ख्या दैनिक बढ्दै गएपछि निषेधाज्ञालाई थप कडा तुल्याइएको छ । जिल्ला प्रशासन कार्यालयले सवारी अनुमति पत्र पनि वितरण नगर्ने निर्णय गरेको छ । जिल्लाका अन्य स्थानीय तहमा पनि निषेधाज्ञा जारी गरिएको छ ।
कोरोना सङ्क्रमणको दोस्रो लहर फैलिएसँगै जिल्लामा सक्रिय सङ्क्रमितको संख्या २ सय नाघेको छ । अधिकांश सङ्क्रमित होम आइसोलेसनमै रहेपनि गम्भीर लक्षण लिएर अस्पताल पुग्ने सङ्क्रमितको संख्या पनि दैनिक बढ्दो छ ।
