काठमाडौं । ग्रीन लाइफ हाइड्रोपावर लिमिटेडले निर्माण गरिरहेको खानीखोला आयोजनाबाट वैशाखदेखि बिजुली उत्पादन हुने भएको छ । ४० मेगावाट क्षमताको नदी प्रवाहित (रन अफ दि रिभर) सो आयोजनाको काम अन्तिम चरणमा पुगेको छ ।
नेपाल विद्युत प्राधिकरणसँग ग्रीन लाइफले गरेको विद्युत खरिद बिक्री सम्झौता (पीपीए) अनुसार २०७८ वैशाख १ गतेदेखि व्यापारिक उत्पादन थाल्ने उल्लेख छ ।
आयोजना बनाउन ७ अर्ब ६५ करोड ३८ लाख रुपैयाँ अनुमान गरिएको छ । प्रतिमेगावाट लागत १९ करोड १३ लाख रुपैयाँ पर्ने देखिएको छ । आयोजनाको साधारण लगानी फिर्ता हुने अबधि ८.१ वर्ष तथा डिस्काउन्टमा लगानी फिर्ता हुने अबधि १७.८९ वर्ष छ । ब्याज तथा कार्यालय सञ्चालन खर्चमा वृद्धि भएको कारण कुल तथा प्रतिमेगावट लागत थप भएको ग्रीन लाइफले जनाएको छ । आयोजनामा प्राइम कमर्सियल बैंकको नेतृत्वमा नबिल बैंक र सिटिजन्स बैंकको सह–वित्तीयकरणमा ऋण लगानी भएको छ ।
आयोजनाको कुल क्षमतामध्ये २५ मेगावाटको निर्माण कार्य अन्तिम चरणमा पुगेको ग्रीन लाइफले प्राथमिक सेयर (आईपीओ) निष्कासन प्रयोजनका लागि सार्वजनिक गरेको विवरणमा उल्लेख छ । यसमध्ये १५ मेगावाट बिजुली साउनदेखि उत्पादन हुने प्रक्षेपण गरिएको छ ।
आयोजना दोलखाको गौरीशंकर गाउँपालिकामा बहने खानीखोला, हनापु खोला र नाप्के खोलाको पानी मिसाइ सो परिमाणमा बिजुली उत्पादन गर्ने लक्ष्य छ । २५ मेगावाट विद्युत उत्पादनका लागि दोलखा जिल्लाको गौरीशंकर गाउँपालिकाको खानीखोलाको पानीलाई प्रयोग गरिनेछ । १२.५ मेगावाटका दुईवटा टर्वाइन राखिएको छ ।
२५ मेगावाटको प्रतियुनिट ४ रुपैयाँ र सुक्खायाममा ७ रुपैयाँमा पीपीए भएको छ । व्यापारिक उत्पादन सुरु हुने मिति पर्ने आर्थिक वर्षलाई आधार मानी त्यसपछिको प्रत्येक आर्थिक वर्षका लागि ३ प्रतिशतका दरले ९ पटकसम्म मूल्यवृद्धि दिइएको छ ।
यस्तै १५ मेगावाट बिजुली उत्पादनका लागि नाप्के खोलाको पानीलाई २५ मेगावाटका लागि बनाइएको हेडवक्र्सको इन्टेकमा मिसाइनेछ । हनापु खोलाको पानीलाई २५ मेगावाटका लागि बनाइएको फर्बेमा मिसाइ विद्युतगृहमा थप १ युनिट टर्वाइन जडान गरी कुल ४० मेगावाटको निर्माण गरिने कम्पनीले जानकारी दिएको छ ।
१५ मेगावाटको वर्षायाममा प्रतियुनिट ४ रुपैयाँ ८० पैसा र सुक्खा याममा ८ रुपैयाँ ४० पैसा छ । ग्रीन लाइफले १० वर्षसम्म पूरै तथा ५ वर्ष ५० प्रतिशत आयकर छुट पाएको छ ।
ग्रीन लाइफले २० प्रतिशत अर्थात ३४ लाख ९६ हजार ४०० कित्ता आईपीओ निष्कास गर्न लागेको छ । आईपीओ भोलिदेखि निष्कासन हुँदैछ । कम्पनीको जारीपुँजी १ अर्ब ४४ करोड रुपैयाँ छ । सर्वसाधारण तथा कर्मचारीहरूका लागि छुट्टयाइएको पूरै सेयर निष्कासन भएपछि कम्पनीको चुक्तापुँजी १ अर्ब ८० करोड रुपैयाँ पुग्नेछ ।
सेयर खरिदका लागि न्यूनतम १० र बढीमा १ लाख कित्तासम्म दरखास्त दिन सकिनेछ । प्रभु क्यापिटल लिमिटेडले ३४ लाख ९६ हजार ४०० कित्ता साधारण सेयर प्रत्याभूति (अण्डरराइटिङ) गरेको छ ।
जारीपुँजी १ अर्ब ८० करोडको १० प्रतिशत अर्थात १८ करोड रुपैयाँबराबरको १८ लाख कित्ता आयोजना प्रभावित स्थानीय बासिन्दाका लागि बिक्री खुला गरिएको सेयरहरूमध्ये बिक्री नभएका १६ लाख ९६ हजार ४०० कित्तासमेत गरी ३४ हजार ९६ हजार ४०० कित्ता आईपीओ निष्कासन हुन लागेको हो ।
यसमध्ये ६९ हजार ९२८ कित्ता अर्थात कुल निष्कासनको २ प्रतिशत कम्पनीमा कार्यरत कर्मचारीहरूलाई र १ लाख ७४ हजार ८२० कित्ता अर्थात कुल निष्कासनको ५ प्रतिशत सेयर सामूहिक लगानी कोषका लागि सुरक्षित गरिएको छ । बाँकी ३२ करोड ५१ लाख रुपैयाँ बराबरको ३२ लाख ५१ हजार ६५२ कित्ता सेयर सर्वसाधारणहरूमा निष्कासन गर्ने गरी छुट्टयाइएको छ । निष्कासन तथा बिक्री प्रवन्धकमा बीओके क्यापिटल मार्केट लिमिटेड रहेको छ ।
केयर रेटिङ नेपालले “केयर एनपी बी (आईएस)” प्रदान गरेको छ । यस रेटिङ्गले निष्कासनकर्ता वित्तीय दायित्व पूरा गर्न उच्च जोखिममा रहेको आधार जनाउँछ ।
